Riffilkaup

[Dr.Gæsavængur]

Sælar skyttur!

Vil byrja á að lýsa ánægju minni með þennan vef. Hef skoðað og fylgst með í nokkurn tíma en skráði mig loksins í dag. Skemmtilegar, jákvæðar og málefnalegar umræður í alla staði!

En þá að alvöru málsins. Með þessu innleggi mínu vildi ég fá ykkar álit og skoðanir á mínum næstu riffilkaupum Ég seldi fyrir ekki svo löngu síðan riffilinn minn í cal.308win. af gerðini Ruger mark2. Núna stendur til að kaupa nýjan til að fylla í skarðið. Hann er ætlaður til allra almennra veiða á Íslandi, hæfilega mikilla æfinga á pappa og svo væri gaman að fikta við skotmörk á lengri færum, núna þegar ég hef eignast sjónauka sem sem gefur mér tækifæri til þess. (Sightron siii 8-32x56).

Eftir að hafa skoðað allt það helsta sem í boði er hafa tveir rifflar heillað mig mest. Fyrst er það Tikka T3 Varmint og núna nýlega er það Rössler Titan 6.

Tikkan fyrir alla sýna reynslu á Íslandi, fullt af ánægðum mönnum sem tala um áræðanleika og nákvæmni.

En eftir að hafa skoðað Rössler rifflana betur er maður alveg á því skella sér á einn þannig. Möguleikinn á skiptihlaupi, þessi frábæri bolti og öll önnur hönnun heilla mjög mikið.

Planið hefur verið að finna góðan og vandaðan alhliða veiðiriffil með þungu eða milliþungu hlaupi, á þessu verðbili um eða undir 200 kallinn.

En þá er komið að aðalhöfuðverknum. Kaliberið!? Hef sveiflast úr einu yfir í annað síðustu mánuði en er þó orðinn nokkuð fastur á því að kúlan verði 6,5. Skemmtileg kúlustærð.

Þannig er þá staðan, að velja á milli Tikku T3 varmint í 6,5x55 eða Rössler Titan 6 í sama cal.
Nú eða hin 6,5 caliberin sem Rössler bíður uppá. Sem eru 6,5x47 og 6,5x284. jú og.260rem. Er orðinn virkilega spenntur fyrir þeim líka. Vil gjarnan fá aðeins flatara cal (en .308) sem gæti líka gert góða hluti á lengri færum.

Þá er orðið ykkar, endilega sannfærið mig um ágæti caliberana sem um ræðir eða bendið mér á eitthvað sem ég er ekki að nefna. Væri gaman að heyra frá mönnum sem eiga svona riffla og geta hjálpað mér að velja á milli þeirra.

Með von um hjálp við valkvíðanum...

[Gísli Snæ]

Er með Tikku T3 Varmint í 260 Rem. Gæti ekki verið sáttari við þann riffil og það caliber.

[maggragg]

Hérna er smá umræða um rössler og reynda tikku líka.
skotvopn/rossler-rifflar-t189.html
Báðir mjög flottir en ég persónulega er spenntari fyrir Rössler. Er með Lothar Walther hlaupi og flottan lás. Einnig auðvelt að skipta um hlaup og caliber.

Varðandi caliberin þá verðurðu ekki fyrir vonbrigðum með neitt af þeim sem þú nefndir. Er sjálfur með 6.5x55. Langar mest í .260, m.a. vegna short action lássins sem það býður uppá en 6.5x47 er líka spennandi. Ef þú vilt meira þá er 6.5x284 stærri baukur með þeim kostum og göllum sem því fylgja. ( Flatara, meira bakslag, styttri ending hlaups, meira púður ) Það er ekki eitt rétt í þessu og hvað sem þú velur þá verðurðu sáttur við það miðað við þau cal sem þú nefndir. Veit ekki hvor þetta hjálpaði eitthvað

[Gisminn]

Get sagt þér að ef þú áttir 308 þá væri með tilliti til falls ekki vtlaust að fá sér 6,5x55 við gerðum test frá 150 metrum og upp í 300 metrum og var ég með 100 graina í 6,5 en hann með 150 graina kúlu í 308 Hvorug hleðslan heit bara nákvæmar, 150 núllpunktur hjá báðum á 200 munaði 4mm milli kúlna og svona var þetta út á 300 en þá var ég með fall upp á 31.3cm en hann 32,1 cm.
En það var áberandi hvað 308 fann meira fyrir vindrekinu en við vorum ekkert að spá i því okkur langaði bara að læra á fallið upp í 300.
Ég gef mér það að þú hafir verið farin að læra fallið á 308 svo 6,5x55 væri ekkert mál að samsvara sér í. En viljir þú enn flatara þá koma hin sterk inn.
Hjálpaði sennilega lítið við valkvíðanum en gaf þér allavega einn vínkil á málið.

[maggragg]

Varðandi fallið þá má segja að það sé ekki merkjanlegur munur á milli 6.5x55, .260 og 6.5x47. Þau koma öll sömu kúlu á mjög svipaðan hraða og svo sambærileg að það er varla hægt að bera þau saman þegar um fall er að ræða, aðeins aðra þætti. Ferill kúlu ræðst eingöngu af hraða og BC stuðli kúlunnar og ef notaðar eru sömu kúlur í þessi caliber á sama hraða er fallið nákvæmlega það sama á milli þeirra.

.308 getur líka verið nokkuð flatt ef það er með réttu kúluna á réttum hraða, en þó aldrei eins og 6,5 kúla á réttum hraða

[TotiOla]

Sæll Atli

Ég sé að þú ert í mjög svipuðum hugleiðingum og ég var hér fyrr á árinu þó ég hafi reyndar ekki komið orðum jafn vel að því og þú gerir hér að ofan

Þú leitar klárlega á rétta staðinn fyrir svona pælingar. Það er ómetanlegt fyrir okkur óreyndari að fá að dýfa stórutánni í reynslubrunn þeirra sem hér skrifa og fá hreinskilin og kurteis svör án allra fordóma og skítkasts.

Hér getur skoðað þau svör sem ég fékk. Þau hjálpa kannski eitthvað, þó mér sýnist þú vera kominn langleiðina með þetta sjálfur

[Dr.Gæsavængur]

Jú takk strákar. Öll umræða er auðvitað af hinu góða. Spurning hvort það auðveldi svo fyrir mér valið eða geri mér enn erfiðara fyrir Ég set fallið svosem ekki endilega mikið fyrir mig, maður lærir alltaf á það þvi ekki er það óumflýjanlegt. En af 6,5 kúlunum væri kostur ef það væri sem flatast frá 100-300m og kæmi vel út á löngum færum. Svo vill maður hafa þetta sem nákvæmast. Ég er heldur ekki að skjóta svo mikið árlega að hlaupbrennsla verði eitthvað vandamál.

Einnig kemur kanski inní reikninginn að ég er enn ekki farinn að hlaða skotin mín sjálfur. Það kemur þó að því fyrr en síðar. En þá er spurning hvað fæst af tilbúnum skotfærum í þessi sérstæðari caliber? Ég lét þá í Hlað um að hlaða fyrir mig í .308, ættu þeir ekki að geta haldið því áfram í segjum 6,5x47? Því það er að heilla mig einna mest í Rösslernum..

Já rétt Þórarinn, er á svipuðum stað held ég. Fannst Tikkan flott hjá þér! Núna hef ég nánast lesið hvern ritaðan staf um þessi vopn.. Allvega á íslensku, svo ég fer að nálgast rétt val vonandi..

[Veiðimeistarinn]

Dr Gæsavængur, skrifar ,,Hann er ætlaður til allra almennra veiða á Íslandi, hæfilega mikilla æfinga á pappa og svo væri gaman að fikta við skotmörk á lengri færum" og ,,En af 6,5 kúlunum væri kostur ef það væri sem flatast frá 100-300m og kæmi vel út á löngum færum".
Miðað við þetta þá virðist Russlerinn henta þér best með 6,5-284 þú getur fengið það hlaup orginal síðan hefur nokkrum Tikka 6,5x55 verið verið breytt, það er rimmaðir í 6,5-284.
En miðað við það sem þú segist ætla að nota riffilinn og hvaða kostum þú vilt að hann sé búinn er 6,5-284 engin spurning af þessum kaliberum sem þú nefnir.
Ég þekki 6,5-284 mjög vel og tel það eitt af bestu alhliða veiði caliberunum sem fáanleg eru.
Hins vegar verð ég að viðurkenna vankunnáttu mína á 6,5x47 og 260 (6,5-06), ég hef aldrei seð þá vinna á veiðum en miðað við getu þeirra í markskotfimi ættu þetta að vera fín veiðikaliber líka alveg á pari við 6,5x55 sem ég þekki mjög vel líka raunar betur en 6,5-284 og veit að það hefur ákveðna annmarka hvað fall varðar þegar út á löngu færin er komið eða um 300 metra sem þú nefnir.
Ég held að þegar upp er staðið sé 6,5-284 fjölhæfari en hin caliberin sem þú nefndir í 6,5 en heldur eftir sem áður flestum þeirra eiginleikum ef hleðslan er minnkuð og kúlurnar þyngdar

[Hrafnjo]

Sælir

Ég var í svipuðum pælingum fyrir um ári síðan. Langaði að stækka mig uppúr .243(6mm) og fara í 6.5mm. Í fyrstu var ég alveg harðákveðinn í að taka .260rem, sama góða hylkið og ég var vanur, bara aðeins þyngri og þykkari kúla.

Á endanum fór ég svo í 6.5x47 og ástæðurnar voru eftirfarandi:
- Hannað af Lapua árið 2005 fyrir hámarksnákvæmni uppí 300m.
- Nýtir púður og þrýsting einstaklega vel, enda tölvureiknað.
- Mjög góð hlaupending.
- Gamall draumur, var næstum búinn að fara í þetta caliber árið 2008.
- Nýtt og spennandi.

Þú þarft aldrei að veiða neitt með því að skjóta yfir 300m á Íslandi nema þú sért að leita sérstaklega eftir því. Ef þú ert á þeim buxunum að skjóta á lengri færum þá eru öll þessi 6.5 caliber mjög góð, ef kúlurnar eru notaðar rétt líkt og Magnús segir hérna að ofan.

Vil samt taka það fram að ég hleð sjálfur og get þannig föndrað við að finna hleðslu í minn riffil. Þetta var það sem heillaði mig en þetta heillar kannski ekki þig, það er nú snilldin við þetta allt saman, okkur líka mismunandi hlutir.

Ég er sjálfur bara búinn að skjóta riffilinn aðeins til og koma honum í punkt, en það mun reyna á hann í grenjavinnslunni næstkomandi helgi.

En gangi þér vel og hvað sem þú færð þér þá er það eina sem dugir að vera nógu duglegur að skjóta og fá þannig tilfinningu fyrir tækinu sem þú ert með.

[E.Har]

Tikka fær mitt atkvæði og 6,5-284.

Annars skiptir það ekki máli.
Öll þessi hylki eru fín. Sum mættu hafa meiri púðurgeymi fyrir minn smekk, en með léttum 100-120 gr kúlum breytir það ekki mikklu.

Bæði tikkan og Röslerinn vel frambærilegir. Hef séð mánudagseintök af báðum en heilt yfir toppgræjur.

Er ekki málið að taka bara báða af því þetta er aldrei spurning um hvað maður þarf bara hvað mann langar í.

[skepnan]

Sæll Atli Freyr, þegar ég var í þessum pælingum fyrir nokkru síðan þá horfði ég mjög stíft á Rössler vegna skiptihlaups möguleikans. Svo eru þeir líka vel smíðaðir. Eftir mikið "hugsihugs-hugsihugs" eins og Bangsímon þá ákvað ég að .270 væri minn tebolli. Svo eftir hálfa öld eða svo á veraldarvefnum þar sem ég var búinn að hringa sjálfan mig nokkrum sinnum þá ákvað ég að skella mér á Howa Talon vegna skeptisinns og dempunarinnar sem að það gefur, og gæti ekki verið sáttari. Fékk Óla til að sérpanta einn inn fyrir mig með sendingu sem að hann var að fá þá.
EN samt hef ég nokkrum sinnum hugsað hvort að ég hefði átt að taka Rösslerinn og aukahlaup
Gisminn, vinur minn til óteljandi ára, er með 6,5x55 og mjög sáttur en aðrir í kringum mig eru með 6,5-284 og telja það guðlast að nefna önnur kalíber á sama klukkutímanum og 6,5-284

Niðurstaða: ég tæki Rössler í 6,5-284 og hugsaði mig svo bláan í framan yfir því hvernig aukahlaup ég fengi mér svo

Kveðja Keli

[Spíri]

6,5x284 verður það næsta sem ég fæ mér hvort sem ég læt ríma tikkuna mína eða hvort það verður látið smíða utan um nýjan stiller lás En eitt er það cal sem mér finnst alveg hreint frábært til veiða á ref og varg en það er 6mm284. Hraðinn á 70grs Nosler kúlunni er yfir 4000 fet á sek það fékk ein geldlæða að kynnast fyrir viku síðan, en hún var að verða full nærgöngul við lambféð og var ekki annað en að senda noslerinn á hana og átti hann stefnumót við hana 203 metra frá mér Þess skal getið að ráðna grenjaskyttan hefur verið látinn vita

[Gisminn]

Góður en ég hélt að allir bændur væru með of stóra þumla til að eiga svona fallega byssu

[Padrone]

Sæll Atli

Ég var í þessum sömu hugleiðingum bara fyrir rétt um mánuði síðan.
Kröfurnar sem ég gerði voru: Þungt hlaup, viðarskepti og 6,5x55
Eftir að hafa farið í Vesturröst, Hlað, Veiðimanninn og Sportbúðina uppá höfða komst ég að þeirri niðurstöðu að Rössler var eina valið.

Ástæða þess að ég vildi fara í 6,5x55 var að það er fjölbreyttasta kúluvalið af þeim verksmiðjuframleiddum skotum sem eru fáanleg hér á skerinu, svo best sem ég viti.

Ég er ekki kominn með endurhleðslu réttindi en þegar þau verða komin í hús þá er MJÖG líklegt að ég skoði 6,5x284 (ekki annað en að kaupa annað hlaup á Rösslerinn, kostar líklega 50-75 þúsund

Ég rakst á þennan pistil um Rössler Titan 6 http://sportveidi.net/?p=524 (en hann er allavega ekki virkur hjá mér núna).

En að lokum, til hamingju með Sightroninn, gæði í gegn (hef ég heyrt)

[Dr.Gæsavængur]

Sælir og takk aftur fyrir svörin allir.
Allt góðar pælingar sem fram hafa komið. Og það er rétt E.Har, að best væri bara að taka báða. En einn alhliða riffill skal það vera og fannst mér þá tilvalið, þar sem caliberaáhuginn breytist eftir vindátt, að fara í Rössler. Það er hreinlega of mikið við hann sem heillar mig. Þá sérstaklega skiptihlaupin, boltinn, stillanlegi spangikkurinn, beddaða viðarskeptið, skotgeymirinn, öryggið og það að rústfría útgáfan er bara 5þúsund krónum dýrari. Minn fyrri var rústfrír og kann ég vel við það. Fallegt í hnotu og já Padrone, ég las þessa grein áður en hún virtist hverfa.. Virkilega góð! Riffilinn virðist allstaðar fá þessa umsögn.

Eftir ýmsar vangaveltur um caliber er ég samt við það að detta á lokaval. Nú bíður allavega Rössler í cal. 6,5x47 eyrnamerktur mér í búðinni. Finnst það höfða best til mín í dag og eiga vel við nútímalega hönnun riffilsins. Hef þá alltaf val um að breyta til síðar enda var ég orðinn nokkuð ákveðinn í x284 sem heillar mig líka mikið einsog það virðist gera með fleiri hérna.
Svo þá er bara að máta sjónaukann við (næsti hausverkur-sjónaukafestingar), ganga frá kaupaheimild og byrja lætin!

Svo byrtast sennilega myndir þegar allt er komið saman og búið er að prufa.

Takk fyrir aftur.

[El mundos]

Til hamingju með valið Atli

Ég hefði valið nákvæmlega það sama