Takk fyrir það Árni.
Ég sá þennan þráð um daginn en einhverra hlutavegna fann ég hann ekki aftur. Er búinn að finna hann núna og einsog þú segir er margt gagnlegt í honum þó ég sé aðalega að leitast eftir reynslu af kúlum í 6,5x47 hylkjum. Ég væri einmitt helst til í að prufa Nosler 120gr. BT kúluna en sýnist hún, samkvæmt vefnum, vera uppseld í hlað. Á þó eftir að mæta þangað og spyrjast fyrir um það. En sem varakost væri fínt að fá fleiri hugmyndir.
Ingvar: Það sem þú bendir á með Scenar kúluna er vissulega rétt. Hún er hönnuð í markskotfimi og er þrusu góð á því sviði. En mér finnst það þó ekki óskiljanlegt að ég hafi valið hana. Kanski er ég bara svona skilningsríkur. Einsog ég nefndi í upphafspóstinum var ætlunin að nota aðra og stærri kúlu til veiða. Reyndar nefndi ég ekki að árið áður hafði ég lánað riffilinn til veiða, þá nýjan, ásamt 130gr. Sierra GK skotum. Ári seinna (í fyrra) fæ ég reyndar ekki úthlutað dýri en er síðar pikkaður upp af biðlista og fékk að veiða kú. Þegar kom að því að versla skotfæri og hefja æfingar voru þær kúlur að mig minnir ekki til. Ég mæti í verslunina sem ég er vanur að versla við og treysti og er einfaldlega ráðlagt að taka þessa kúlu. 120gr. Scenar var reyndar ekki til svo ég prufa 108.gr. Rétt fyrir skotpróf gátu Hlað menn ekki hlaðið fyrir mig svo að ég keypti 100gr. verksmiðjuframleiddu skotin til að taka með í prófið. Eftir próf og æfingar var ég hæst ánægður með þessi skot (47stig á skotprófi) og þar sem stutt var í veiðina tók ég þá ákvörðun í samráði við sölumenn að nota bara þessi skot í veiðina enda var ég mjög öruggur með þau.
Ég fór ekki í mjög djúpar pælingar með þessi skot ásamt google frænda en ég sá að þau hafa verið notið við ýmsa veiði án teljandi vandræða. Þó kúlan sé hönnuð í markskotfimi ætla ég að skotin séu ekki ólögleg í veiði á hreindýri. Þau opna sig í bráð og kúlan er yfir 100gr með holan odd. Nýlega hef ég heyrt að þau séu samþykkt af Lapua í veiði. Þó ég finni ekkert um það núna þar sem netið í vinnuni lokar á flestar erlendar vefsíður tengdar skotvopnum. Þau væru allavega varla seld í veiði af fagmönnum með reynslu ef þau væru beint ólögleg. Því finnst mér sömuleiðis ekki óskiljanlegt að bæði prófdómari og gæd geri einhverja athugasemd við notkun þessara skota. Það er líka ákveðinn rökstuðningur í mínu máli að þeir hafi einmitt ekki gert athugasemd við það. Það staðreynd að þessi kúla hefur verið notuð á hreindýraveiðar síðustu árin og ekki er reynsla mín af henni að segja mér neitt annað en hún skili því hlutverki bara ágætlega. Ég er samt ekki að halda því fram að Scenar kúlurnar séu bestar eða stórkostlegar. Bara löglegar, vel brúklegar og ég sé ekkert að því að nota þær eftir ráðleggingum og reynslu annara.
EN... Stórt EN... Þó ég hafi notað þessa kúlu með góðum árangri geri ég mér grein fyrir að það eru til fleiri kúlur sem margir telja betri í þessar veiðar. Ég er því eiginlega að setja fram þessar pælingar mínar í leit að heppilegri kúlu í verkefnið. Sérstaklega þar sem ég ætla nú að skjóta minn fyrsta tarf. Ég skil því vel þessar áhyggjur þínar, ég var líka aðeins skeptískur á þetta í byrjun. Finnst þetta þó sett þannig fram hjá þér að þér finnist ég hafa verið að gera eitthvað rangt. Menn eru alltaf með misjafnar skoðanir. En í þessu tilfelli tel ég að þessi kúla líði aðeins fyrir það að hún sé upphaflega hönnuð til markskotfimi, því hafi hún bara ekki verið notuð það mikið í veiði að á hana sé komin einhver útbreydd altöluð reynsla. Ég hef allavega aldrei heyrt neitt slæmt um þær.
Þú ert greinilega annarar skoðunnar en gaman væri samt að heyra frá þér hvort þú hafir prófað þessar scenar kúlur og hver reynsla þín sé af þeim eða þá með hverju þú mælir í staðinn.
Allt í mikilli vinsemd
Kv Atli
