Ég er á móti hvalveiðum.

[Sveinbjörn]

Ég er á móti hvalveiðum.
Ég er svo mikið á móti hvalveiðum að ég ætla að koma þessu á framfæri á sem flestum stöðum. Því miður hef ég ekki nennt að læra á Fés-bók og hvet því sem flesta að deilda þessu sem víðast..

Þannig er að ég þekki mann sem þekkir mann sem þekkir mann sem átti bita af Langreið.

Þetta smakkaðist alveg sérstaklega vel og var ljúft í munni. Á ferðum sínu hafði þessi biti af hvalkjöti komist í hendur á kokki einum sem hafði lagt til kryddlög sem var notaður til að marinera. Sneiðarnar voru um það bil 14 millimetrar á þykkt. Það passaði að skella þessu á snarpheita pönnu í skamma stund. Tæplega 60 sek. eða svo. Að því búnu var steikinni snúið og lok sett yfir pönnu. Svo var pannan tekinn af heitri hellunni og látin standa í tæpar tíu mínútur.

Fyrst þetta góða kjöt smakkaðist alveg sérstaklega vel og ég get vel hugsað mér af hafa þetta oftar á borðum. En viti menn þetta er ekki í boði. Jú það er hægt að fá Hrefnukjöt sem er líka gott en þau rök eru jafn gild því sem afasystir mín hafði á borðum og vildi hún banna allt nema það sem af Sauðkind kom. Það er hægt að redda Landa, Dópi, Rislyfjum og Sterum á skömmum tíma og fáum við reglulega raunasögur af því í gengnum RÚV.

En kjöt af stórhveli er verra að verða sér út um? Af hverju og hvaða samsæri er í gangi gegn mér sem ólst upp við það að fá hvalkjöt reglulega hjá móðir minni. Ýmsar kenningar hafa flogið í gegnum huga mér. Samantekinn ráð við landbúnaðar mafíuna í skiptum fyrir stuðning við umdeildar veiðar? Fór Kristján í Öskjuhlíð með Hrefnuveiðimönnum og gaf þeim eftir markaðinn í skiptum fyrir eitthvað annað? Er kjötið kannski fullt af þrávirkum og eitruðum efnum sem safnast fyrir í skepnum sem lifa lengi efst í fæðukeðjunni? Er þessu kannski stýrt af Japönsku mafíunni sem vill ekki að kjöt sem eingin vill flytja verði selt í Bónus á verði sem gæfi slæmt fordæmi? Grænfriðungar halda því fram að kjöt af stórhvelum sé selt sem lúxus hundamatur. Ef svo er þá eru við Íslendingar minna virði en hundar í augum þessa gamla þrjóska manns sem gerir út hvalbáta.

Meðan utanríkisþjónusta Íslands er notuð óspart í að fegra málstað hvalveiða og lempa til þá sem eru á annarri skoðun en Kristján. þá tel ég að mér eigi að standa til boða afurðir af ölum tegundum af veiddum hvölum. Meðan Hafró og aðrar stofnanir í eigu Íslenska ríkisins eru notaðar í rannsóknir á hvölum og öðru vistkerfi tel ég sanngjarnt að mér standi það til boða að velja mér bita af hval til kaups. Meðan við stöndum í stappi við vina þjóðir og stórveldi til að verja rétt okkar til hvalveiða tel ég eðlilegt að mér standi til boða að fara í Bónus og versla bita af hval. Svo á að vera val um 1, 2 og 3 flokk því að á öllum skepnum eru misgóðir vöðvar. Kjöt er ekki bara kjöt eins og flestir vita nema þeir sem drekka Latte og borða pasta með kjúklingabitum í.

Ég hvet alla til að vera á móti hvalveiðum í atvinnuskini á Íslandsmiðum þar sem heima mönnum standa ekki afurðir stórhvela til boða.

Helst af öllu óska ég þess að ég sé að misskilja þetta allt saman og í framhaldi af því. Þar að segja ef ég er með rangan misskilning á þessu með aðgang að kjöti af stórhvelum mun ég að sjálfssögðu taka upp fyrri stuðning minn við veiðar Kristjáns og hans vösku manna.