Á greni

[Veiðimeistarinn]

Við Sveinn Pálsson á Aðalbóli lágum á fyrsta greninu um síðustu helgi, fórum og leituðum útstykkið í Rana.
Tófan hafði lagst í eitt greni af 10 sem við vitjuðum, hún lá í Þúfunni austan í Ytra Eyvindafjallinu, þar sem hún hefur legið nær árvisst síðan við sveinn fórum að sinna grenjunum í Rana fyrir 9 árum.
Við náðum strax einum hvolpi sem ég kallaði út úr greninu og greip, síðan var læðan skotin þegar hún kom heim, refurinn lét aldrei sjá sig og er sennilega dauður áður.
Það eru sennilega eftir tveit hvolpar í greninu sem verða teknir í glefsur, vegna þess að éir eru heldur þurrir á manninn síðan ég tók hvolpinn hann er svo grimmur og skrækti mikið þegar ég tók hann og gekk illa að þagga niður í honum þar til ég kom honum í búrið og gat breitt yfir hann.

[Gisminn]

Flott aðstaða notar þú flautu við að kalla út ?

[iceboy]

Já þeim líkar vel við þúfuna, ég fór með pabba þangað fyrir, liklega um 15 árum síðan, og hún var nú oftast á þúfugreninu, enda kannski sem betur fer, það er nú ekki versta aðstaðan þar, betra að eiga við hana þarna heldur en t.d á Halldórsöldunni

[Guðmundur]

Skemmtilegt að sjá þetta. Hef sjálfur aldrei farið á greni en vonandi verður það einhverntíman.

[Veiðimeistarinn]

Já Árnmar, pabbi þinn fór með Sveini í gærkveldi að vitja um glefsurnar á Þúfunni og rifjaði upp gamlar minningar með honum.
Það var einn kvolpur kominn í og þá er einn eftir, Sveinn ætlaði aftur nú í kvöld að vitja hans, en refurinn hefur ekki enn látið sjá sig og hefur sennilega verið skotinn í vor.
Nei, ég nota ekki flautu, ég ,,húkka" sem kallað er, líki sjálfur eftir hljóðinu sem dýrin nota þegar þau koma heim á grenið og kalla hvolpana út.
,,Spotti" á Aðalbóli kenndi mér þetta, en þetta er mjög líkt hjá mér og hljóðin hjá Theodór á Bjarmalandi á refur.is
Það er hægt að líkja eftir allskonar dýrahljóðum, hreindýrabaulið er samt erfitt þó mér hafi stundum tekist að stoppa kálfa með eftirhermum, síðan þurfti ég þess ekki lengur eftir að ég fékk hreindýraflautuna en það er hægt að spila á þau með henni nánast að vild.

[Veiðimeistarinn]

Jæja, eitthvað höfum við Sveinn vantalið hvolpana í Þúfugreninu, hann fór inneftir í kvöld að vitja grenisins, þá var einn í og hann heyrði í fleirum, hann egndi glefsurnar beið og gaggaði annað slagið í hálftíma og þá voru tveir í viðbót komnir í svo það voru alls 5 hvolpar í greninu, 2 mórauðir og 3 gráir, læðan var mórauð svo refurinn hefur væntanlega verið grár.

[Veiðimeistarinn]

Það var legið á öðru greni núna um helgina, Tungugreninu inn af Hrafnkelsdal. Það náðust bæði dýrin strax, læðan var heima þegar við komum klukkan 15 á grenið, fyrra skotið geigaði og hún náði að öskra og svæfa grenið eins og við köllu, það er að ekki er að vænta að hvolpar komi út svona cirka næstu 2 sólarhringana, en hún fór ekki langt hljóp 250 metra niður fyrir grenið og stoppaði þar og þá var ekki að sökum að spyrja þegar Sveinn hefur skotið þær í færi stein liggja þær.
Það var helv.... vind sperringur sem setti strik í reikninginn.
Síðan kom refurinn tveimur tímum seinna og lá snarlega, hann kallaði út hvolpa og sáust 3 en öskrin frá læðunni dugðu samt enn og þeir vildu ekkert við okkur tala, svo það voru settar glefsur í grenið og haldið heim á leið.