Skyttuspjallið

Þannig er mál með vexti, að vegna vinnu minnar þá þarf ég að hafa samband við hina ýmsu skrautfugla þessa lands og nú í bítið hafði dottið út farsímasendir í Hrífunesi. Þá var ekki um annað að ræða en að fara í local símaskránna hjá okkur farsímastrákunum, sem er excel skjal á sameiginlegu drifi þar sem við höldum utan um símanúmer hjá þeim einstaklingum sem við getum þurft að hafa samband við vegna hinna ýmsu mála...

Þessi skrá er nú ekki mikið notuð, en engu að síður nokkuð gagnleg þegar svo ber undir. Það sem vakti athygli mína þegar ég renndi augum yfir hana í leit að símanúmerinu hjá þeim ágæta manni sem hefur með Hrífunes að gera, að í henni eru 3 ágætir Jökuldælingar, kannski ekki allir jafn þekkrir en athugasemdirnar við nöfn þeirra eru samt nokkuð lýsandi fyrir þann anda sem ríkir á mínum vinnustað. Hugsanlega er farið frjálslega með staðreyndir og mönnum kannski gefnir titlar af handahófi sem þeir hafa ekki endilega unnið sér inn. En ég læt þetta flakka hér inn og vona að einhver hafi gaman af smá innanhús húmor hjá Símanum...

Hrólfsstaðir Jökuldal - Guðmundur (frændi) S: 471-**** / Bóndi og löggildur ullarmatsmaður. (Áður hreppstjóri og formaður sóknarnefndar.)

Merki Jökuldal - Stefán & Solla S: 471-**** / Bóndi og veghefilsstjóri einnig formaður kvenfélagsins. Sendum honum eitt sinn Koníak fyrir afburaðar störf í þágu almenns símasambands í Jökuldal, sem fólst aðalega í því að draga nokkra starfsmenn Símans og Mílu upp úr forarpitti fyrir ofan bæinn hjá sér.

Kelduárveita - Sigurður Aðalsteinsson S: 471-1070 / Veiðimaður, bóndi og forsöngvari í karlakór Jökuldæla.

Ekki veit ég nú hvernig Sigurður Aðalsteinsson rataði inn í þessa símaskrá sem forsvarsmaður fyrir Kelduárveitu, hann getur kannski svarað því sjálfur. Þarna vantar líka inn annan mætan íbúa á Jökuldalnum Vilhjálm á Skjöldólfsstöðum, sem hefur unnið frækin afrek á sviði hreindýraveiða og póstferða um Jökuldalinn. En við erum einmitt með sendir upp á Skjöldólfsstaðahnjúk.

Þannig er líka athyglisvert að leiðir okkar Sigurðar hafa sennilega krossast talsvert oftar en hann grunar þar sem ég er búinn að þvælast um öll fjöllin í hans heimasveit á þeim 13 árum sem ég hef unnið við uppsetningar og viðhald á farsímasendum hjá Símanum. Ég man þó ekki eftir því að hafa þurft að hafa samband við hann vegna Kelduárveitu.

Þar inn í eru eitthverjir tugir ferða upp á Háurð, bæði yfir vaðið á Hrafnkelu fyrir neðan Háurðina og innfyrir Aðalból og þar upp hlíðina og aftur út fjallið í öllum mögulegum veðrum á öllum mögulegum tímum árs, til þess eins að Siggi geti horft á sjónvarp, talað í síman og komist á netið... einnig hef ég keyrt í eitthver skipti upp úr Hrafnkelsdal og þaðan sem leið liggur inn í Snæfell bæði að vetri og sumri.

Já þetta er flott símaskrá
Upplýsingarnar sem fylgja nöfnunum eru kannski ekki kórréttar, þær eru svona meira á Jökuldælska vísu og eiga býsna vel við þessvegna en það hefur verið lenska austur þar að láta ekki svona sprok gjalda sannleikans
Hvað upplýsingarnar um mig varðar, þá var ég að vinna inni í Keldárveitu frá hausti 2008 til vors 2009 hjá Landsvirkjun við umsjón með svæðinu og vinnubúðunum þar ásamt ýmsum eignum landsvirkjunar þar.
Þá kom einmitt upp að GSM sendirinn varð rafmagnslaus þar þegar rafmagnið fór og kláraðist af rafgeymunum og ég var sendur eftir að hafa tilkynnt þetta og allt var ófært þarna inneftir, til að fara í skúrinn með sendinn þar og slá inn rafmagninu, svo þurfti ég að fara þarna í skúrinn oftar til einhvers eftirlits sem ég man ekki lengur í hverju fólst.
Hins vegar var ég umsjónamaður sjónvarpssendisins á Háurð sem þú minntist á líka ásamt pabba í mörg ár.
Alveg frá því hann var fyrst settur upp árið 1974 til 2002 meðan ég bjó á Vaðbrekku í dalnum undir Háurðinni.
Ég var búinn að fara margar ferðir þar upp í allskonar veðrum, gangandi, á snjósleða og jeppanum eftir atvikum og gera við sjónvarpssendinn, með NMT símann á eyranu eftir að hann kom til og þeir Júlíus og Kristján á Eiðum á hinum endanum að leiðbeina mér um hvað ég ætti að gera.
Áður enn NMT síminn kom til 1989 fengum við upplýsingar gegn um símann niðri á Vaðbrekku og skrifuðum þá það helsta á blað og höfðum með okkur upp á Háurð, síðan ef það gekk ekki upp, var bara að labba niður aftur og tala aftur við þá félaga og fá viðbóta upplýsingar og tölta síðan aftur upp og reyna að gera betur.
Hins vegar kom ég mér fjótlega upp skotlúgu á ytri hurðina á tækjaskúrnum uppi á Háurð og bar þar út æti fyrir tófu í mörg ár og lá þar fyrir tófu ásamt Sveini á Aðalbóli og okkur varð oft býsna oft vel ágengt þar, allt upp í 5 tófur eftir nóttina, oft 2 og jafnvel 3 þegar best lét.

Enn og aftur vantar like hnapp.

Skemtilegar sögur og símaskrá